《財富》中文網尋日公布一二年最具創新力嘅中國公司排行榜，絲絲留意到，除咗騰訊繼一一年再度稱雄之外，其他公司嘅排名同舊年比較都幾唔同，似乎仲有唔少新面孔，上榜嘅25間公司之中，包括排第二位嘅上汽集團在內，竟然有成16間係新上榜，又一次證明咗長江後浪推前浪。
重工業喺大部分人眼中，似乎同創新扯唔上關係，但係三一重工就向大家證明呢個諗法係錯嘅。舊年只係排名十三，最新排名係第三，總裁向文波話，秘訣係要做其他人做唔到嘅嘢，對佢哋公司嚟講係創造新產品取代進口貨。向總話，公司5萬幾名員工之中，研發人員佔咗7,000名以上，而且每一次產品創新，公司都會將客戶、工程師同代理商集齊參與，務求實現客戶獨特嘅諗法。
至於創新霸主騰訊又有咩心得呢？騰訊首席技術官張志東講，QQ推出咗十二年嚟，版本更新嘅次數多不勝數，除咗有新功能，好似chat room之外，仲有搞世界盃特別版等等噱頭，能夠做到新idea源源不絕，秘密就在於「10/100/1,000法則」，即係每個產品經理每個月做10個用戶調查，關注100個用戶blog，同埋收集1,000個用戶體驗。正如創辦人馬化騰所言，最好創意往往嚟自最簡單，甚至聽落有啲蠢嘅方法。