絲絲講場：財圈龍B浪接浪
財經界龍B湧現，絲絲呢頭收到金利豐研究部執行董事黃德几報喜，囝囝出世喇，嗰頭就收到消息，法巴上市衍生產品部聯席董事趙海珠（Alison）有喜，趕上龍B尾班車。
黃德几兒子收市後出世
黃德几（Dickie）尋日傍晚好開心咁通知絲絲，話佢太太生咗龍B，母子平安，龍仔重8.5磅，有好深雙眼皮，仲一出世好多頭髮，Dickie話佢最開心係一抱起仔仔就唔喊，而且係四點半港股收市後出世，無阻住老竇睇市，認真叻仔兼乖仔。佢仲話兩仔爺好有緣，都係龍年出世，雖然公司依家未有男士侍產假，但老闆朱太，一向都有封大利是畀員工嘅B仔B女嘅習慣。
呢位新成員同佢家姐湊成一個好字，Dickie仲好鬼sweet，話一家四口個英文名一定要玩接龍，字尾要接字頭，Dickie接太太Eva接女女Aika，即係仔仔個名會係A字頭。
趙海珠生活習慣要改晒
靚女趙海珠（Alison）亦都有喜，而且仲好大機會趕上龍B尾班車，Alison同絲絲講，依家未知道BB係男仔定女仔，但就一樣都咁開心，最緊要係健健康康，而且當初佢都冇特登指定要喺龍年生，所以得知喜訊後都好驚喜。
有咗BB，Alison依家嘅生活習慣都有改變，如11點前就要睡覺，盡量戒食生冷嘢，結果連佢最鍾意食嘅雪糕，依家都要戒口唔食得住。
絲絲數數手指，輪場好似係財經界最多生仔女喜事，法巴郭小菱（Shirley）嘅龍女、摩通黃文絢（Chiane）同麥格理徐海霖（Olivia）嘅龍仔，其中Shirley同Chiane剛放完產假並正式復工，絲絲喺度祝願佢哋家庭事業繼續兩得意！
余詩韻