香港銀行界嘅資深女賓架（banker）買少見少。信銀國際尋日公布，喺公司服務咗十五年嘅行政總裁陳許多琳（Doreen）將喺今年內退休，係繼恒生銀行（00011）梁高美懿之後，另一位離開銀行界嘅女高層。
Doreen十八歲就加入銀行界，擁有超過三十五年經驗。佢喺一九九七年獲邀加入信銀國際之前，已經係渣打銀行嘅零售銀行部主管，經驗豐富。佢曾講過，轉職係希望尋求新突破。信銀國際喺通告中，亦讚揚Doreen喺任內「不斷改革創新，屢創高峰」。
陳太喺工作以外，亦熱心公益活動，例如喺基督教靈實協會、浸會大學等機構出任公職，相信佢退休後亦不愁寂寞。信銀國際無講Doreen嘅具體退休日期，只話會喺適當時間公布繼任人選，絲絲喺度預祝Doreen退休後生活愉快，亦期望佢日後會有新嘅突破。