絲絲講場：希慎廣場開張 利氏總動員

銅鑼灣核心地舖呎租係全球最貴嘅前幾位，希慎貴為CWB嘅大地主，一舉一動都吸引到大家眼球，商場尋日正式開幕，場面認真墟冚。利氏家族屬於低調型，絲絲喺現場見到好多嘉賓，當然冇辦法數得晒有幾多家族成員撐場，超過十個都應該冇走雞。

希慎主席利蘊蓮（Irene）尋日負責開幕大典，絲絲仲見到利孝和夫人、利漢釗博士、利榮傑、Irene嘅妹妹利蘊珍，當然唔少得行政總裁劉少全，仲有西餅王后李曾超群。

設空中花園夠綠化

Irene滿場飛招呼賓客，佢同絲絲講，「好期望希慎廣場可以成為區內地標。」成日都話香港經濟同零售市場放緩緊，佢就話唔擔心，有信心長遠市況能夠穩定發展。

個project咁大，Irene最讚賞喺4樓嘅空中花園，可以提高物業嘅環保同綠化意識。希慎興業企業傳訊部盧曼清講，希慎廣場商場租戶超過120個，尋日有近100個租戶已經開業，至於商場平均呎租大約150蚊，今年上半年整個希慎廣場租金收入約8,700萬元。

余詩韻