創維數碼（00751）尋日公布咗七月份嘅銷售數據，雖然銷售增一成，但銷量就跌咗9%，公司同時宣布，聘請黃宏生做集團旗下創維電視控股嘅顧問，為期一年，黃培昇做深圳創維-RGB電子嘅彩電制造部副總經理，為期三年，引起絲絲興趣嘅係，呢兩個人咁熟口面嘅！其實佢哋兩兄弟之前咪係主席同執董囉，不過曾因犯法而被拉。
翻查資料，佢哋喺○四年底，喺廉署一次代號「虎山行」嘅行動中被拘捕，衰咩？咪係串謀盜竊同詐騙公司五千幾萬囉，仲有夾埋詐騙發放認股權等等，最後被判監六年，嗰陣創維仲停咗牌成年有多，去到○六年頭先復牌！計吓時間，佢哋應該刑滿咗唔係好耐。
點解搵番佢哋幫手？公司有好詳盡解釋o架，黃宏生係公司創始人，對集團嘅未來成功有巨大利益貢獻、佢喺消費電子行業有深厚經驗同寶貴人脈資源，至於黃培昇，就喺彩電行業管理採購有深厚經驗同擁有良好人際關係。黃宏生每年顧問費96萬元，黃培昇應收到每年72萬元嘅薪酬，另加上適用創維-RGB相似職級員工嘅其他福利，每年所得總收入唔會超過100萬元。黃宏生嘅太太林衛平，依家都係創維董事，合共持創維34.17%權益，另黃宏生都揸住2.67%權益。