一直想「國際化」嘅內地房地產大佬萬科，喺早排就用10億元買咗永泰地產（00369）旗下南聯地產（01036）超過70%股權，唔講唔知，佢哋一直都好想喺香港落腳，原來早喺廿年前，仲落嚟香港偷師呢！
萬科總裁郁亮尋日嚟咗香港，交代吓佢哋過去半年嘅成績。郁總話，早喺20年前佢已經有向新地（00016）偷師，仲曾「潛入」過佢哋樓盤，學習吓佢哋物業管理技巧咁話。不過絲絲相信，郁總最大得着應該係點樣將一個50平方米（約530呎）嘅單位間成三間房，因為佢自己覺得要做兩房都難喇喎，梗係啦，喺內地90平方米以下都可以叫小戶型！
好多人都想知佢哋買咗南聯地產後，有咩具體大計，佢話唔講得住，不過話晒萬科買入南聯就係想國際化，郁總話，未來萬科將會喺海外物色發展同投資機會，只要係多華人聚居嘅地方都可以考慮，除咗美國之外，咁多野學到嘅香港當然都係唔錯嘅選擇啦。
之但係點解會揀南聯呢，郁總覺得就係因為南聯業務少，等佢哋由零開始做起，作為一個嘗試，未來可以慢慢壯大，實行要由細湊到佢大。
其實做咩都要有目標，萬科發展就愈做愈大，而郁總就愈來愈fit，佢同絲絲講，原來佢每日用20分鐘跑完5公里，佢希望可以60歲前嚟香港跑一轉42公里嘅全馬添！
余詩韻