近期股市難料，德拉吉「捍衞歐完得個吉」，股市無力上，但上星期都升咗三百幾點，都算係咁啦。全世界又話阿爺準備再做嘢，我哋又放長雙眼睇吓點。喺一眾盈警股充斥市場嘅同時，有盈喜自然令人心情合皮，講緊嘅係現代教育（01082），佢哋話收入顯著增長，唔使講梗係補習收入回升啦。
大家都知補習差唔多係每個中學生必備嘅戰略，得唔得一件事，心理好過確係最緊要。考唔到，都可以講句我已盡咗力，加上補習市場嘅教學方法同Prof. J一樣，都係以爆同潮再加上互動作賣點，令到呢個二手市場活躍起來。不過，大家都知，好做嘅市場往往吸引咗好多人衝入去做，咁梗係令到市場競爭白熱化同要以競爭性價格去搶客。所以大家見到啲巴士，個個補習天王都chok到爆，Prof. J想學都唔敢，哈！
今年收入增加，其中一個就梗係「334」嘅出現，係新舊交替嘅一年，補習市場當然受惠於呢個相關資產嘅流動性已有所提升。確實容易理解，但係下年會唔會因呢個市場嘅「引伸」縮咗，令到佢哋嘅生意有所影響，咁樣梗係要睇吓吳主席點樣大顯神通。分析到依家，Prof. J決定轉戰攻「高檔補習教授天王」，希望自己可以補出個未來，哈，繼續追蹤，出發！
香港大學電子金融服務榮譽助理教授 徐燦傑