洪良（00946）畀法庭勒令用10.3億元回購番小股東嘅股份，嚟補償招股書有誤導性資料對小股東嘅損失，呢件已經係香港嘅創舉！尋日證監會又有新猷，用Q&A方式解答小股東可能有疑問嘅地方，做法都好少見，唔知係咪回應小股東訴求？
點解絲絲咁講？皆因有小股東對回購仲係唔太了解，絲絲亦聽聞佢哋向證監會反映，有啲股東仲好緊張咁搵證監會幫手，唔想再畀人呃多次。
洪良呢次回購股份，係要開股東會得到小股東表決通過，先可以成事嘅。絲絲聽到有洪良小股東話，佢哋對於點樣參與投票都唔係好明解，事關佢哋係透過銀行或者證券行買咗洪良股份嘅，因為好想表決通過攞番錢，所以好着緊投票嘅事，仲同咗證監會反映添！證監會都話收到有呢方面嘅查詢。
尋日喺網站登嘅洪良投票《常見問題》超過十條，幫小股東明解番點樣獲得回購股份，裏面都有提到透過證券經紀或者銀行持有洪良股份嘅小股東，可以點樣處理投票問題，小股東不妨參考下。希望呢次回購順順利利啦！