絲絲最近成日都聽到呢間公司要澄清、嗰間公司又話要澄清，到底要澄清啲咩呢？咪就係佢哋公司自己擺嘅烏龍囉！
好似遠東宏信（03360）咁，尋日就公開澄清話上個月20日發出嘅英文版營運概要通告有錯，原本同台灣嗰邊簽訂嘅銀團貸款合同應該係2億美元，但就因為文書錯誤變咗20億。犯呢啲錯誤嘅又點只遠東宏信吖。
仲有周大福（01929）七月頭發布嘅年報裏面，將公眾持股量嘅比例寫做10%，隔咗成個月，即係尋日先澄清番，其實正確數字應該係10.7%至啱。而天瑞水泥（01252）上個月底發出嘅通告就將公司個儲備搞錯，將31.92億元人民幣寫錯成8.22億元人民幣。雖然呢啲都係小錯，但如果下次搞錯嘅係盈利或者負債金額，小股東見到嚇餐飽都似！
點解仲咁多錯呢？而且呢啲錯誤好多時都係過咗一、兩個月先會有人出嚟澄清。如果有股東因為錯誤消息而招致損失，呢幾間公司真係難辭其咎啊！