未來趨向「金融超市」
自從深圳發展銀行喺上星期改稱平安銀行之後，平保就成為內地首家集不同業務於一身嘅金融機構，服務範疇包括保險、銀行、證券、信託、基金等等，客戶去到中國平安，就可以選擇自己需要嘅一切服務，唔使左撲右撲咁麻煩。
馬明哲認為，呢種類似金融超市嘅模式，係未來嘅發展方向，佢仲為自己定下「十年計劃」，希望實現來自保險、銀行、投資嘅利潤各佔三分之一嘅目標。
佢仲為計劃改咗萬佛朝宗呢個好鬼霸氣嘅名，佢同內部員工解釋，喺佛經裏面，係萬佛去靈山聽佛祖說法；喺武俠片之中，係練成之後就可以獨步天下。嘩，好勁噃！
余詩韻