近期港股好似坐過山車，大戶想個市升就傳美國推QE3，想個市跌就傳吓歐債問題又再加劇。咁難玩，Prof. J不如留喺屋企睇吓奧運，支持吓國家隊好過。
TCL多媒體（01070）發盈喜後，股價竟然無受盈喜消息刺激上升，反而喺過去幾星期一直「畀人沽」，今年連發咗兩季盈喜，第一季賺3.09億元，其中1.44億元係一次過特殊盈利。
第二季發盈喜，應該係今年第二季和舊年第二季比較，又或者今年上半年和去年上半年比較，都應該有足夠資格發盈喜，唔係靠特殊盈利先夠資格。
投資就好似玩尋寶遊戲，基金經理一般大原則就係尋找價值被低估（undervalue）嘅股票。全部公司盈利倒退或發盈警嘅時候，TCL多媒體發盈喜之餘，但股價又不問因由不升反跌，搞到現股價比每股淨資產仲要低接近30%。
現價暫時未反映盈喜消息，惟論基本因素，公司係全球五大LCD電視生產商，受惠於國家支持內需和環保政策補貼，下半年內地銷售應該唔差。而且公司重申全年銷售目標1,520萬台LCD電視機嘅目標不變，計起即係銷售量增長有40%，比行業平均增長率仲要高，有冇咁誇張呀！
聽老友講，而一二年上半年已有18間基金公司結業，部分基金揸住TCL多媒體，所以先沽出應付贖回，都唔知係真係假。不過，TCL截至三月底時持有54億元現金，如果公司派股息嘅話，我諗一眾粉絲應該會合皮都唔定，繼續追蹤，出發！
香港大學電子金融服務榮譽助理教授 徐燦傑