倫敦奧運啱啱開幕冇幾耐，相信大家都同絲絲一樣，仲沉醉喺當日開幕禮嘅盛況。但其實嗰日仲有另一個活動好值得大家留意o架，就係由中國服裝企業依文集團（Eve Group）搞嘅時裝展喇。
「花生show」推動經貿合作
絲絲推介得嘅當然唔係普通嘅花生騷啦，今次行天橋嘅model有好多都係內地出名嘅商界領袖，好似有聯想（00992）董事長柳傳志、招商銀行（03968）行長馬蔚華、新東方董事長俞敏洪、滙源果汁（01886）董事長朱新禮等人。呢班日理萬機嘅商界大人物一齊換上靚衫，喺英國商務官邸蘭卡斯特宮（Lancaster House）裏面行貓步，比起平時嗰啲model可能冇咁專業，不過感覺真係幾新鮮。
之不過能夠請到商界領袖做model，呢場時裝展來頭認真唔細。呢場時裝展係「中國商務日」嘅頭炮活動，中國同英國都想借奧運呢個機會，傾下點樣喺經濟、文化、創意等多方面可以有多啲合作機會。時裝展背後嘅目的關係到兩國嘅經貿合作，怪唔之得要揀倫奧開幕呢一日舉行啦，原來要隆重其事咁話！