獨立經濟學家謝國忠係出晒名嘅大淡友，啱啱佢喺廈門大學演講，絲絲心諗應該會發表佢點睇淡當前鑽石底都隨時會跌破嘅A股，老實講，A股尋日又創新低，跌至2,107點，危危乎。之不過，謝國忠今次主講嘅原來係大陸嘅樓市，同樣係睇樓，仲叫啲人有錢都唔好買樓，有樓嗰啲仲要快啲放咗佢，都咪話唔得人驚！
謝國忠之所以咁講，係因為佢發覺依家內地嘅市場有所轉變，炒房地產嘅回報，增值空間已經唔大，唔應該再存有任何僥倖心態。佢仲話，如果以房價同年收入比算嘅話，大陸嘅房價係全世界最高，香港嘅樓價都算高，但同年收入比都只係15倍，發達國家亦只有6倍，相反內地北京同上海嘅比例最高，已經去到20至30倍，所以如果有炒樓嘅就嗱嗱臨放咗佢啦！
不過，謝國忠又話，要買樓唔係唔得，但一定要考慮兩樣嘢，第一樣就係如果你諗住租層樓出去嘅，咁都可以考慮，依家始終都仲有好多人買唔起樓，逼住要租樓住，咁嘅話都買得過！第二樣要考慮嘅係房租回報率，如果係高過做定期嘅利息，就可以考慮買樓。
謝國忠唱淡樓市嘅言論引起內地好多網民嘅熱烈討論，有網民就大讚謝國忠嘅言論好有前瞻性，好精闢，仲話佢唔脫離現實！不過亦有唔少網民反駁，話佢嗰頭叫人唔好買，轉頭又話可以買嚟放租，簡直係自相矛盾。絲絲就認為，最緊要係有閒錢，先至最重要！
余詩韻