大家都知道，近期盈警股一籮籮，大家避得就避，但係如果一早話盈喜，出來發盈警，似乎就令到有心跟你走轉嘅投資者大失所望，講緊嘅咪係信義玻璃（00868）。
出盈警少賺四成，坦白講，預咗啦。不過Prof. J分析公司，會着重真實嘅原因，皆因外圍差，大家陪佢哋定係公司自己唔做嘢，令到公司冇貨交，咁管理層就抵打啦！
無貨交都算，但管理層作為公司嘅負責人，佢嘅言論同行為都會影響大家對上市公司嘅睇法！話說佢哋喺四月中，曾經同班記者朋友講，第一季公司嘅毛利率創新高，超過四成，同啱啱講嘅盈警完全係一頭一尾，結果就梗係借盈喜炒上咗5%，轉過彎一走入直路就走晒樣，公司管理層同投資關係部應該小心處理嘛！
呢個世界真係有人唔知點解就信佢衝咗入去，美資基金OZ Captial諗住執好嘢，買入信義新股同一批CB，諗住做吓信義「長途伴侶」。殊不知，唔使兩個月竟然急急腳行使同減持到5%以下，以後走咗都冇人知，確係耐人尋味。但係我更有興趣係，大戶幾時都係有同管理層「通靈」嘅秘技，我哋呢班小股民有排都跟唔上啦係咪！
有無誤導，Prof. J唔敢講，人總係有唔小心嘅時候，最緊唔好重複犯錯，咁就係股民之福。繼續追蹤，出發！
香港大學電子金融服務榮譽助理教授 徐燦傑