INVEST：倫敦奧運 未打先輸
倫敦奧運開鑼在即，但友人卻一家大細由倫敦來港，原來特區政府每人派6,000蚊變相補貼遊埠外，另一原因乃倫敦本身已塞車塞到暈，仲封路畀奧運車隊，日日返工要多一兩個鐘車程，公共運輸系統工會亦都趁機威脅罷工，要求加薪加福利，故老友決定等奧運之後一切回復正常至返去。不過，邢理強反而有興趣想探討吓，今次倫敦辦奧運能否帶來正面經濟效益?
邢理強記起早前《經濟學人》評英國為二○一二年經濟前景最悲觀國家之一，到底各國爭崩頭辦奧運，是否物有所值？全世界商業掛帥，擱下奧運精神，主辦國都以刺激經濟宣揚國力為目標，有成功也有失敗。新近例子是○四年雅典奧運，超支十倍後，也直接把希臘經濟拖入萬劫不復深淵，諷刺的是，歐債危機中經濟焦頭爛額的西班牙，近日公開表示對申辦二○二○年奧運感興趣，莫非想為瀕臨破產的經濟沖喜沖喜？
○五年英國經濟蓬勃，英奧委申辦預算才24億英鎊，今日歐債危機重挫歐洲經濟，側重金融服務的英國更是重災區之一，但點燃聖火一刻，預算卻再三發育，達到90億英鎊，在歐洲多國包括英國在內，公共開支一刀切下，都咪話唔勞民傷財。英奧運部長羅伯遜話，對控制埋單在93億英鎊之內，十分有信心。英國天空電視台卻立即幽佢一默，指公開資料顯示計及奧運公園，隨後的持續經營計劃、奧運區保留公司，及因接待及交通滯延的經濟損失，兩星期多少少的體壇盛事燒掉240億英鎊鈔票，即使打個七折，同原來24億英鎊預算，仲係有九條街差距。
刺激經濟影都無
本來辦奧要建設場館，大興土木，提供大量臨時職位， 有投行統計顯示，一九六四年至二○○八年，奧運舉辦國經濟增長模式相當類近，GDP升幅在開幕前兩至三季達到高峰，並在隨後兩個季度持續放緩觸底，英國公布第二季經濟增長按年跌0.8%，經濟情況遠差過預期，倫敦奧運帶來塞車問題令政府尷尬，卻無為英國經濟提供短暫蜜月期，像○八年北京金堆玉砌的奧運會，恐怕有排唔會再出現。
邢理強