《福布斯亞洲》新加坡40富豪排行榜啱啱新鮮出爐，高踞頭三位嘅富豪同去年一模一樣，好似排第一位嘅係信置（00083）家族兩兄弟，即係信置主席黃志祥同遠東集團總裁黃志達，兩人身家加埋達92億美元，第二位係邱德拔家族，身家67億美元，而第三位係大華銀行主席黃祖耀家族，身家47億美元。而今年有八位新進富豪入咗呢個榜，之不過最令絲絲關注嘅絕對非Eduardo Saverin莫屬，唔係因為佢樣貌出眾，而係因為佢特別嘅發迹路。
排喺第八嘅Saverin，今年只得30歲，唔講可能好多人唔知佢原來係Facebook（fb）創辦人之一，雖然佢同另一位創辦人，fb家陣嘅CEO朱克伯格因為fb而不和，但佢之所以能躋身新加坡富豪榜亦都係多得fb。Saverin同朱克伯格嘅不和曾鬧到上法庭，最終法庭判Saverin獲勝，得到fb共4%嘅股份，以fb早前每股38美元嘅發行價計算，Saverin嘅身家即時暴漲。但有消息指，Saverin喺fb上市前已經將股份私下出售，令到佢今時今日嘅身家達到22億美元。而本身係美籍嘅佢，再一次印證佢嘅頭腦有幾精明，喺fb上市前，就放棄美籍，轉為新加坡籍，貪佢係全球最低稅率國家之一，為咗慳稅唔做美國人又有乜所謂，結果家陣咪名利雙收囉！相反，朱克伯格因為fb上市就要交35%稅款，大嗱嗱16億美元o架！