牛熊輪流炒：中交建29398 趁低吸納
隔晚美國企業業績支持道指回穩，港股昨日幾近平開後，走勢窄幅牛皮，收市升15點終止三連跌，惟上升乏力，下周一期指結算，後市難捉，做好做淡都不宜瞓身。
恒指昨日低位18,793點，高過前日低位的18,710點，擺明淡友無再殺落，收回的8隻恒指牛都是未出生已陣亡的到價牛證，無關現有街貨。前日恒指牛證及Call輪好倉，再有3,160萬元資金流入，計埋過去三個交易日流入資金達1.4億元，同期三日淡倉流出7,901萬元，散戶繼續傾向博反彈。
博反彈的一班好友能否如願，且看人行又進行逆回購加強流動性，加上有長沙市政府發布重大項目投資，總額達八千多億元人仔，今日要炒上的可能性提高。
期權玩家多高手
雖然筆者一向認為經濟起跌有周期，就算美國推QE3，都不是靈丹妙藥，不過內地情況特殊，市場開放程度有限，若重藥放在基建投資，效應可以立竿見影，只是如此一味依賴基建撐經濟，興奮過後要面對長線發展的窒礙，壞處不少。
身邊口痕友經過一周的沉思，大方向依然睇淡，仲話年底前要跌多幾千點，現時不停話股份好抵買的一班專家，豈不是全部睇錯！睇唔通後市，又唔想錯過反彈機會，不妨諗諗中長期Call輪。雖然窩輪內在值較高，若大市趨波動，引伸波幅還有擴大機會。相比正股，輪價始終平一截兼具槓桿作用。
當然，可long可short的期權更有留意價值，只是該市場玩家專業，當對手的技術及資訊都比你高的時候，落場贏面大為局限。內地鐵路股月來強勢，中交建（01800）本周步入調整期，但相關鐵路政策趨向加快速度，方向有利，再配合刺激經濟的措施將針對更多基建建設，可趁機追入中線Call。中交滙豐購（29398）明年十二月到期，行使價6.88元，實際槓桿3.2倍。
Handsome哥