近年內地A股市場真係可以用「一潭死水」嚟形容，以下呢幾位明星股東就更慘，事關佢哋揸住乜乜公司股份都因為自己係明星關係，身家縮咗幾多都會畀人公諸於世。
日前，被冠以姚明概念股嘅合眾思壯預告，今年上半年將會錄得虧損約2,500萬元（人民幣‧下同），令到股價插水，低收14.87元。以依家姚明手頭上仲揸住105.3萬股合眾思壯計，市值同該股前年四月上市首日收市時嘅6,176萬元相比，已經跌到1,605萬元，縮水足足七成！
另一位荷包帳面大縮水嘅仲有文人余秋雨，佢投資咗十一年嘅徐家匯由舊年上市到依家，股價不斷下滑，而手持518.64萬股嘅余秋雨，身家就由當初坐擁1.0855億元，暴跌一半至5,300多萬元。之不過，余秋雨當年係以超平成本241萬元買入徐家匯股份，計落仍有賺逾21倍。
另外，本來係華誼兄弟大股東嘅馮小剛，持股已跌出十大以外，家陣華誼股價60元咁上下，同○九年上市首日收市價70.81元相比，馮小剛身家亦縮水唔少。
明星嘅身家大縮水之餘，一個啱啱由內地《理財週報》做嘅《2012年3,000中國家族財富榜》公布，絲絲就發覺，排第一位嘅首富，原來又係由三一集團（00631）嘅梁穩根家族蟬聯，身家約407億元，但身家亦都縮水接近200億元。