步入炎炎夏日，又係各大家電零售商減價促銷嘅旺季，繼京東商城帶頭掀起減價戰，國美（00493）同蘇寧嘅網上商城亦都喺星期三正式加入戰團，火藥味仲好濃添。不過，國美首席財務官方巍就同絲絲講，呢個只係促銷活動，希望趁暑假可以回饋客戶，仲話公司會喺銷售同利潤中間取得平衡。
國美商城今次嘅優惠會長達十日，商城嘅宣傳廣告更標榜自己係「低價殺手」，最受歡迎嘅3C產品最低5.6折起，小家電嘅折扣亦有8.5折，百貨類產品更低至半價添。方巍話會喺商城度主力推出一啲獨家代理嘅ODM同OEM產品，因為呢啲產品嘅售價可以自己控制到，可以用較抵嘅售價回饋客戶。而對手蘇寧網上商城亦唔執輸，推出為期三日嘅促銷活動，唔單止有一蚊起嘅搶購活動，指定貨品由家電去到生活起居產品，好似香水同沐浴露都有折，不過就只限內地嘅會員參與。
見到競爭對手加入減價戰團，京東商城CEO劉強東就同內地媒體話，下半年京東商城嘅價格戰，會更慘烈同全面。睇嚟家電零售商嘅網上商城減價勢頭依家只係啱啱開始！