絲絲唔知由幾時開始，同名人食一餐飯都變得有價有市，例如同股神巴菲特共進午餐，今年就要價345萬美元。近日中國大陸都興起呢種拍賣潮，而國內第一個拍賣下午茶嘅經濟學家，就係最近得到「佛利民自由獎」嘅經濟學家茅于軾喇。
今次拍賣有五十幾人參加，但最後只有六位最高出價者能夠成為茶會嘅特別嘉賓，可以同茅于軾夫婦飲呢餐下午茶，一齊討論下政經時事，參與競投嘅，年紀最大嘅68歲，最細係八十後。今次拍賣有一個好特別嘅規矩：六位嘉賓裏面最低嘅叫價，即係2萬元，就係其他人需要畀嘅價錢喇。
茅老於茶會開始時解話就講，大家都係買同樣嘅商品，所以應該畀一樣嘅價錢。不過絲絲就覺得有啲奇怪，照規矩呢個拍賣應該係12萬元成交，但點解最後會變咗25.9萬元成交呢？
原來最高叫價者係茅老嘅「瘋狂粉絲」，佢堅持要畀番自己最初嘅叫價，即係15.9萬元，希望可以「支持茅老師嘅偉大事業」咁話。絲絲再睇真啲，原來競投茶會嘅款項全部都會用嚟支持天則經濟研究所嘅學術研究。絲絲覺得，咁有意義嘅拍賣活動，真係不妨舉辦多幾次。