喺上周所謂嘅「黑色星期五」，阿爺出咗增長數據，高過7.5%叫做有交代，OK啦！出口，阿爺要做嘅有限，Prof. J覺得，息唔減得幾多，阿爺要保經濟，一定要喺投資同內需落重藥。
記得上年呢個時候，盈喜股逐隻炒，今年，盈喜冇份，盈警就隻隻中，令到市場嘅氣氛更加係一潭死水，呢個時候，有公司寧願轉攻為守，希望可以同步過冬，講緊係雅士利（01230）。雅士利係內地第七大BB奶粉生產商，市場佔有率百分之十左右，唯一賣點就係用外國奶源，唔怕有三聚氰胺，貪佢夠安全。
雅士利錢就有，但又唔去以上市得來嘅錢擴展版圖，反而拎咗去買總數達5億人仔嘅保本型理財產品，但就畀人哋話佢「不務正業」。
睇吓佢嘅現金，多到離晒譜，佔市值七成咁多，有錢唔擴展，確係令小股東「心底碎了又碎」。雅士利要發展其大志，做好盤數搵個有頭有面嘅長途伴侶，蒙牛（02319）就係一個可以參考嘅對象，正所謂不進則退，去年盈利少咗四成，管理層無得避，要令小股東合皮，回購或者加派股息都可以諗。Prof. J覺得冇嘢搞，可以學吓李寧（02331），叫基金股東落場一齊踢波，或者可能有一個意想不到嘅效果都未定。
香港大學電子金融服務榮譽助理教授 徐燦傑