絲絲講場：馮孝忠禪機論金融
恒生銀行（00011）執行董事馮孝忠（Andrew）一直都係銀行界出名嘅在家佛教徒，平時都會喺佛教雜誌寫吓文章，分享學佛感覺，依家再加少少其他作品，終於結集成書，啱啱出咗新書《人生禪語》。
讚Steve Jobs有禪味
Andrew同絲絲講，呢本新書有一部分，係返工時遇到一啲管理上嘅事件，有感而寫。絲絲睇《人生禪語》分四部分，包括用因果去睇金融市場、同佛教哲學去講管理之道、喺鬧市點樣行禪，同埋佢去京都遊歷嘅感受。
Andrew由入世到出世嘅寫法的確幾易令人代入，佢同絲絲解釋，話管理學同禪有好多相近之處，例如都係要識得「放下」同聆聽他人講嘢，仲話已去世嘅科技界巨人Steve Jobs都係鈴木俊隆禪師嘅弟子，講嘢都有活在當下嘅禪味。
遊歷京都如朝聖
成本書最寫意就係講Andrew去京都遊歷古剎，因為Andrew係皈依咗淨土宗，對佢嚟講應該猶如聖地。至於要學佛睇咩入門書籍，Andrew都以身說法，分享埋佢嘅皈依讀物。
出書宣揚佛法都係為善嘅一種，絲絲問Andrew會唔會有興趣嚟緊再出書，佢就好謙虛咁話睇吓市場反應點先，同埋寫文章，最緊要有feel先寫。
余詩韻