絲絲講場：中石化冧莊500強之首

500強排行榜，係以公司嘅收入計，之不過，睇一間公司係強定弱，仲有其他指標，例如淨利潤同埋利潤率。喺榜內排第五嘅中國工商銀行，就憑住驚人嘅2,082億元（人民幣‧下同）淨利潤，成為榜內最賺錢公司，排第423位嘅招商局國際首次上榜，實際上係榜內公司淨利潤率最高，有幾高？原來係59%，真係幾嚇人。

58家新公司入圍

而500強之中，超過十分一係新面孔。呢58家新進公司，包括中國水利水電建設（排名第32位）、新華人壽保險（排名第33位）、冠捷科技（排名第68位）。

500強嘅總收入達23.7萬億元，比上一年增長25%，相當於中國國內生產總值的一半。總利潤為2.1萬億元，增長了12.8%。呢三年來，中國500強收入喺中國國內生產總值中所佔比重逐年提高，可能係愈來愈多嘅大型公司在過去三年內上了市，另一原因係中國大型公司嘅增長速度總體上高過中小型嘅公司。

正因為咁，入圍門檻比去年再次提高了14.7億元，收入要達到62.08億元至入到圍。