絲絲講場：國泰商務艙全球最正
今年航空需求減弱加上競爭好大，航空公司想搵啖飯食都真係唔易，更何況係「一哥」國泰（00293），所以佢哋就惟有不斷咁upgrade自己。喺舊年，國泰推出第三代商務客艙，聽講整體反應都唔錯，最近仲贏咗個今年度「全球最佳商務客艙」獎添，認真巴閉！
「下半年生意應該好啲」
為咗隆重其事，尋日國泰請埋成班傳媒界去體驗吓呢個新座位，仲派咗常務董事朱國樑（Ivan）嚟做分享。Ivan話，國泰係從一百個國家、二百多間航空公司之中脫穎而出，攞到呢個獎嘅。其實呢個新座位都好有來頭，首先佢哋買咗全球最好嘅三張櫈返來做參考，又用咗五年時間去研發，當中有成二百幾個客人試坐同畀意見，好彩最後個「BB」都冇令人失望，得到超過三十項專利添，搞到成班管理層不知幾開心。
之但係講番業務方面，Ivan就好老實咁講，今年上半年經營好大壓力，整體收入增長低過投入，不過佢就相信下半年多啲假期，希望會好過上半年，最近暑假訂位情況都唔錯喎。