所謂「塞翁失馬，焉知非福」，早排畀美國研究機構香櫞（Citron）發報告攻擊嘅恒大（03333），當日股價大跌超過10%，搞到老闆許家印不知幾咁嬲同唔高興，點知亦都因為咁，令許總成功砌低上個月位於榜首嘅阿里巴巴創始人馬雲，成為咗今個月「中國商界風雲榜」嘅第一名，唔知咁樣會唔會令到佢開心番啲呢？
呢個由道瓊斯旗下Dow Jones Insight搞嘅「中國商界風雲榜」，準則主要係根據最近一個月受全球及地區部分媒體關注嘅中國商界領袖。許總之所以由榜上無名搖身一變到第一名，香櫞真係「應記一功」。早排恒大畀香櫞話佢帳目造假，之後許總開始進行回應同反擊，包括見分析員、見傳媒，之後仲報埋警。香櫞其實都知驚，唱衰完恒大冇耐又「兜番」，聲言恒大冇舞弊同欺騙，只係會計手法激進啲，又話以後唔敢沽空中國股票。
據Dow Jones Insight嘅數據就顯示，就係呢場仲係「進行式」嘅戰鬥，令到許總成為今個月受媒體關注最多嘅中國企業界人士。
許總成為咗本月風雲之最，不過絲絲又發現，恒大就做咗內房賺錢最強。據《財富》中文網尋日公布嘅二○一二年財富中國500強排行榜，其中喺房地產榜名單入面，雖然收入就唔夠內房老大萬科717.83億元人仔多，要做第二名，不過賺錢呢，恒大就以近114億元人仔，贏咗萬科嘅96億元人仔，成為最賺錢嘅內房。
余詩韻