CY（特首梁振英）上任前係咁收集民意，依家開始要找數，金占士知道CY啱啱將大堆金融界意見，分類交咗畀金管局、證監會等相關機構，要佢哋整理同寫番份建議書。呢個係佢嘅大project，極有可能喺佢首份施政報告佔重要部分，所以一定要做得好好睇睇。
金占士知道CY收集嘅意見好廣泛，證券界有來自七大華資經紀組織，仲有銀行界、會計界等意見。佢優先要做嘅，係跟進《內地與香港關於建立更緊密經貿關係安排》，即CEPA框架協議，所以佢分好晒有關意見，轉交相關機構跟進。
當中銀行業內地發展近年進展順利，金管局跟進空間較少，例如CEPA9協定允許本港銀行內地進行證券結算資金同期貨按金託管，同埋深圳前海設金融公司都有進展。反觀最複雜，意見最多，同埋最需要政府幫助嘅，都係證券業。
據聞CY交畀證監嘅意見，包括RQFII、證券業內地開展業務、中港兩地合作同埋各種技術問題，華資經紀同金占士呻，CEPA早喺○三年推出，但人民幣未開放，令證券業受惠最少，最近放寬香港證券行內地設合資投資顧問公司股權，可由三分之一提高到49%，對小型行真係無幫助。
點解呢個大project無交畀港交所（00388）呢？原來當中有唔少問題，同作為上市公司嘅港交所有利益衝突，而且財力夠嘅港交所亦已先行同滬、深交所合組公司開發金融產品，所以證券業北上嘅問題，只可交由中、港證監洽商先夠中立。
金占士