今年五月中，馮國綸（William）升級做利豐（00494）「揸fit人」，市場聚焦下個月利豐嘅中期成績表，睇吓William有無交足功課，或者集團嘅三年計劃有咩眉目。而緊盯住呢份業績嘅市場人士，又點可能唔「刨」埋瑞銀分析員梁裕昌（Spencer）嘅分析報告打底呢，尋日絲絲就收到瑞銀最新報告，發覺Spencer立場依舊，仲係鍥而不捨咁大力唱淡利豐。
舊年起出晒名同利豐「不咬弦」嘅瑞銀，對利豐向供應商收取高回佣嘅模式唔多buy，曾經一度將利豐目標價降至「全城至低」嘅9蚊，有份分析利豐嘅Spencer更史無前例咁同利豐公然隔空駁火，令市場嘩然之餘，亦教曉投資者摸清利豐嘅潛在風險。睇番瑞銀份報告，今次主攻位置都係質疑利豐子公司Direct Sourcing Group（DSG）嘅長遠盈利能力，估計今年繼續蝕錢。
據沃爾瑪其他供應商透露，沃爾瑪定單已經愈嚟愈難有錢賺，所以瑞銀對專為Wal-mart（沃爾瑪）尋找貨源嘅DSG生意更趨悲觀，瑞銀仲提醒投資者，舊年DSG已無法達到利豐原預期至少約20億美元嘅銷售指標。既然無利好因素，瑞銀更順理成章重申對利豐嘅「沽售」評級，包括目標價11蚊，同樣無得升。