依家做公司管理層真係一啲都唔容易，睇實公司嘅管治已經夠勞心勞力，有時甚至要做埋產品代言人。絲絲尋日就八到，一向喺股壇吃得開嘅Look's Asset Management董事總經理兼投資總監陸東，原來曾經擔任過TCL通訊（02618）出產嘅手機平面廣告嘅代言人，重畀佢老婆讚廣告造型靚仔到差啲唔認得添。
明星做產品代言閒閒哋都要收番幾十萬嘅代言費，不過作為TCL通訊獨立非執董嘅陸東就夠晒義氣，一○年加入TCL通訊之後，就幫公司當時最新款嘅智能手機做代言，重係分文唔收友情客串演出。
聽聞佢見到自己個平面廣告出街都好驚喜同意外，因為無諗過可以做到星級代言人。絲絲覺得佢太謙喇，以佢嘅號召力絕對可以吸引到一眾粉絲留意個廣告同埋個產品。
既然咁成功，不如Encore吖！原來佢哋真係有咁樣諗過o架，既然佢都入咗board，應該會好願意幫吓手嘅，絲絲相信Encore嘅機會都好大。
手機戰要搵代言人，同系嘅TCL多媒體（01070）主打電視機，就打接近大眾策略，早前喺深圳機場安檢位置裝咗幾部裸眼（即係唔使戴特殊眼鏡都睇到）3D電視機，喺大家排隊等緊安檢嘅同時，又可以親身體驗吓佢哋嘅新產品，呢個宣傳方法的確唔錯。
余詩韻