股市唔上唔落，恒指昨低開逾百點後，輕觸式一試19,233點低位，收市倒升，回順至19,419點，升23點，主板成交434億元。技術上港股處於中線升軌之上，宜守住19,300點關，後市上定落，要睇埋周五的內地數據。
隔夜坐倉的資金流向，恒指牛證及認購證好倉錄得3,159萬元資金流入，淡倉流出了1,086萬元，街貨及資金同時反映投資者傾向相信後市跌唔落。
窩輪成交按日增5.3%至50.17億元，恒指窩輪繼續暢旺，佔比升至35.4%，國壽（02628）活躍，佔比近一成。至於昨日成交最大的建行（00939），成為跌得最多的恒指成份股，因遭內地傳媒爆出了30億人仔壞帳，股價一度挫至4.89元，埋單4.93元，跌近3%。
建行被質，連帶其他內銀都無運行，恒指卻不跌反升，動力之一來自本地地主佬，新地（00016）發威升3.55%，獲券商上調評級，是表現最好藍籌，相關窩輪一齊起動，平日成交唔多，昨日就增加逾倍至3,000萬元。
新地剛成功投得前北角邨地皮，用69.1億元，較預期低7%。雖然坊間唔少人高唱樓價過高，下跌前景若隱若現，但政府換屆之後，部分券商開始覺得早前的預測可能太悲觀，供應不會即時大增，搵緊機會轉口風，新地呈圓底回升以來，昨日突破阻力，浮上95元之上，可留意中期價外認購證，新地法巴購（14750）明年二月四日到期，行使價100元，實際槓桿7倍，引伸波幅32%。
Handsome哥