金融徐筆：瑞年重新注入炒味
阿爺送完大禮，市場好似又失去咗方向，鬼咩，大禮「舊曲新調」，無乜料到加上梁生一上場，一話唔打擊樓市，地產大帝全面升，最絕係幫啲年輕人搞旅舍，呢一代嘅朋友真幸福，所以Prof. J死都要認年輕人，博一博自己有梁生福利照住咁就好！
同屈臣氏有合作
炒股唔炒市又開始大派用場，「隻股冇人搞又點會郁」。瑞年國際（02010）上市時長江生命科技（00775）已經係股東，股價喺一一年高位之後坐滑梯衝咗落去，近期李生再次出手增持，有粉絲問Prof. J，李生入市有乜契機。當然瑞年早前公布業績銷售有三成增長，加上主席又不斷增持，難免大家會好似我偶像黎明嘅舊歌──傻癡癡一樣，一廂情願呢？
長江生命科技一來一回，持股量比IPO時候低，投資瑞年大概可以同佢產生關係，正所謂生意不成仁義在，何況有關係？加上主席話會同李生嘅屈臣氏玩合縱連環，睇落又有一點睇頭，由李生嘅關係入屈臣氏嘅現存銷售管道，確有一定程度上嘅協同效應。
咁應唔應該入呢？Prof. J睇過圖，周三消息一出就「一棍震神州」，嗰日喺電視台都講過，如果第二日佢一開已經喺上日最高價上，仲唔衝！不過，通常逆向思維確係冇得頂，昨日回吐加震吓你走都預咗，Prof. J會以1.95元作為第一個止蝕位，跌破1.9元就全部走人，睇吓今次嘅走勢又會唔會係我哋傻癡癡嘅諗法？
香港大學電子金融服務榮譽助理教授 徐燦傑