近排股市靜到死，好似港股咁，尋日成交僅僅高過四百億元，老友話債市好玩好多，早排玩內房債，跟住轉炒歐美銀行債，最近仲好玩，連一啲好陌生嘅銀行都出嚟發債，有冇風險大家自己研究喇！
老友分析，資金湧晒落債券度，可能係呢啲咁特別嘅銀行發債嘅誘因，好似俄羅斯標準銀行、阿拉伯銀行同伊斯蘭銀行，都加入發債行列，聽講話個別債息仲超過四厘。
個債市唔熱鬧就奇，債券部門真係做到無停手。其實債市係沙漠中嘅一片綠洲，金占士聽到部分美資行嘅債券部門要逆市請人，其他部門就無咁好景，四處cut cut聲。
好似研究部門咁，以前不嬲都係市差嘅重災區，依家新股冷清，今年香港都唔知入唔入到三甲，之前有投行都減緊人，早輪就有日資行同韓資行要瘦身，點知近排有中資行都嗌難做，好似話裁咗幾個人，就知環境真係唔好。講開又講，以前未必間間投行都喺債券部門落重本，依家就爭住請人，真係有風水輪流轉嘅感覺。
金占士