花名「總舵主」嘅陳家樂又轉咗會，由海通證券（香港）跳槽過安信國際證券（香港），佢話會着手搞間行嘅銷售部門，配合安信攞到RQFII資格，嚟緊都好多生意做。
總舵主同絲絲講，佢上任安信國際證券投資服務部董事總經理，只有幾個星期，講起安信個名，佢提絲絲千祈咪搞錯係嗰間借錢財務公司呀，因為間財務公司狂煲廣告，真係有人以為間財務公司係佢哋集團嘅，其實兩者無關係o架，咁絲絲笑番佢要提高安信國際知名度啦。
然後佢同絲絲講番歷史，話說早年好多內地證券公司出事，國務院財政部喺○五年八月撥款63億人仔，成立咗「中國證券投資者保護基金」，最後由個基金同深圳市投資控股，喺○八年將三家問題證券行中國科技證券、中關村證券同廣東證券，整合成為安信證券，個基金持股83%。
安信證券就喺○九年五月收購南方證券（香港）成立安信國際，正式在港發展金融業，陳家樂喺證券業做咗成廿幾年，做過法巴、招商、海通證券等，依家就被挖角到安信，佢話唔會開分行搞零售證券，只會專做大客嘅證券經紀、資產管理、投資銀行同期貨業務。