又到半年一度派成績表嘅時間啦，上半年榮獲最佳成績進步獎嘅非JP Morgan（摩通）莫屬，佢由舊年啱啱好躋身亞洲債券十大包銷商，到今年上半年坐喺第二把交椅，足足跳升咗八級，絲絲相信有好多人都好想知道背後嘅原因係咩。
JP Morgan得到如此佳績，唔多唔少都要多得和記黃埔（00013），因為和黃喺眾多銀行之中揀咗JP Morgan幫佢哋做企業債券嘅包銷，八單之中，有五單都交畀JP Morgan，淨係和記一個客都已經有42.7億美元債券交畀JP Morgan做包銷，計埋其他25個客人，JP Morgan真係想唔入三大都好難。
根據統計資料，JP Morgan今年上半年包銷咗74億美元，足足比舊年同期多一倍，真係突飛猛進。而市佔率就勁升到10.6%，雖然同龍頭大哥滙控（00005）嘅15.5%仲有一段距離，但係JP Morgan有咁嘅成績已經好出色，至少係擊敗咗花旗集團、德意志銀行同埋瑞銀集團成為第二位，德意志發言人就好有信心咁話下半年嘅排名一定會唔同，佢好肯定自己可以升返上去，不過就有人認為JP Morgan有機會威脅到滙豐一哥嘅地位！