九月立法會選舉就快到，今個月中會開始接受提名，唔少功能組別都醞釀變身換人，其中金融服務界選情亦「風起雲湧」，絲絲聽聞，唔少人正積極游說中銀國際副執行總裁謝湧海、同港交所（00388）前行政總裁周文耀等重量級人士出嚟參選，「選情」真係好熱鬧！
先講「謝總」，聽聞佢今年底會退休，想做多啲公職事務。佢之前已加入成為金融發展局籌備小組其中一名成員，為CY（梁振英）出謀獻策，加上佢多年來嘅中資大行背景，因此有資深「卜架」話，有人游說佢出嚟參選，絕不出奇。
至於周文耀，絲絲亦收到風，有中資證券界大佬游說佢出嚟參選。咁周文耀喺行內嘅江湖地位同過去掌管港交所時「政績」，大家都毋庸置疑。事實上，現任金融服務界議員詹培忠亦曾講過，周文耀係合適人選，願意退位讓賢，不過，對方「唔制」！
除咗上述兩位被人推舉外，絲絲亦收到風，業界有唔少人「蠢蠢欲動」，正試探市場反應，醞釀出來「玩吓」，其中包括有泛民背景人士。
因此，姑勿論最終會有咩人出嚟參選，呢場金融服務界立法會選舉，真係未上演先受注目啦，大家真係要坐定定等睇戲！
余詩韻