MARKET INSIGHT：中國海外 龍頭地位穩
下星期祖國公布第二季GDP，由A股表現大致看到，投資者對當前中國經濟頗為悲觀，瑞銀估計，數字揭示削減庫存等因素影響，上季持續疲弱的經濟活動，估計按年增長7.6%（環比上升7%），創○九年首季以來新低。
不過，六月開始人行連環透過提供流動性支持經濟的舉動，包括預期達8,000億人仔的新增貸款，以及固定投資回升的刺激，瑞銀估計通脹急速回落至接近2%水平，為未來進一步寬鬆政策提供更多空間。話口未完，人民銀行喺傍晚宣布減息，揀星期四出手，陰謀論估計係挾埋歐洲央行齊齊出招。
講開放水，人行昨日進行450億人仔逆回購操作，短短兩星期內，祖國第二輪注入流動性，市場計過兩次出手，威力合共等於人行減兩次RRR，講真，人行可以做的都做咗。
A股唔領情，昨日一度連2,200點心理關口也見失守，收市則跌1.1%報2,201點，事後孔明話兩次逆回購，等於降低人行減RRR機會，聽落幾荒謬，股民唔係希望阿爺放水？
市場對中國經濟着陸（無論硬抑或軟）的疑慮，漸見惡性循環，愈放水市場對短期經濟展望睇得愈悲，今次逆回購加埋減息之後，再落去，常規寬鬆財政政策可能已唔足以振奮市場信心，可惜4萬億人仔救市，講到明可一不可再，但經驗告訴我們，股市唔可能直線向下，當所有投資者漠視利好消息慌忙逃生，正醞釀一次技術反彈，相信離我們不遠矣。
歐洲央行議息前，港股觀望氣氛濃厚，尚幸估歐洲減息的勇士為港股午後打氣，加多兩錢肉緊，掃高港股99點收報19,809點，主板成交奀到極得403億元。大市欠缺焦點，即市炒家零星博近期落後的股份，好似李寧（02331）、南戈壁（01878）及周大福（01929）升勢悅目，可惜秤落各有缺點，只怕技術反彈完結後，又再悶死隔離。
瑞聲伺機上破雙頂
擾攘多時，蘋果公司終於與深圳唯冠就商標糾紛傾掂數，廣州高院判蘋果支付唯冠6,000萬美元，以換取iPad商標於內地的使用權，新iPad將於二十七日起入內地市場。
早有分析員指，新iPad銷量首年可能達唔到市場預期6,600萬部的目標，撞啱可以番中國正式開售，相信一眾果粉及股東都可以鬆一口氣，而區區6,000萬美元，每部賣貴番一百幾十，條數都好快番嚟。
不得不提，有份生產iPad喇叭的瑞聲科技（02018），也間接受消息刺激，見過25.35元上市新高，可惜收市落番24.8元，升1元。展望未來一季，聞樓梯響多時的iPhone 5，應會推出迎戰三星的S3及新四核Galaxy Note，大把消息跟尾，技術上，瑞聲只要升穿25元的雙頂阻力，唔難見28至28.5元。
短期內中央政策有鬆無緊，近月內地準業主對入市興趣明顯增強，昨日內地內房股龍頭萬科A股，六月份銷售數字又一次超越市場樂觀預測，實現樓面及銷售額122.4萬平方米及133.2億元人仔，按月增長19.4%及24.2%。
內地樓市需求回升
目前為止，十一間本地掛牌內房股公布了六月份數據，平均銷售額錄得按月41%增長，值得留意，六月平均樓價回升3%，與五月削價1%以刺激銷量不同，樓市需求回升甚為明顯。龍頭股中國海外（00688）六月份數據未出，但首五個月，完成全年800億元銷售目標的63%，按目前趨勢，加上六月同業紛紛報捷的銷情，中海下半年調高目標可能性唔細。
中海股價也多少反映優於同業的經營狀況，昨收報18.24元創兩年半收市新高，儘管股價跑先一步，但業績多年來不斷改善，一二年市盈率9.7倍，較之以往動輒二三十倍來得合理，隨着一輪汰弱留強，內地壓抑樓市政策出盡，中海可望脫穎而出，也是睇好內地房地產發展加快的必選股份。
古勝