金占士上次講咗幾間內地證券集團，傾緊買香港投行同證券公司，依家收到風其中一間好近磅，有望最快呢兩個月內成事。另外仲有一家大嘢都傾得幾埋，不過由於老細心頭高，所以就吊高嚟賣。
話說呢間內地十大中資行之一嘅買家，舊年開始洽購一間美資在港投行，間行由證券、融資到資產管理都有，仲保薦過幾間公司上市，雖然保薦嘅公司融資規模同股價表現都麻麻，但就恃住自己「五臟俱全」，可以「即買即用」，所以叫價都幾高。
金占士知道間中資行嘅香港分行，有幾個高層反對今次收購，認為個價錢唔平，據聞近幾個月仲有香港員工走咗，依家留響度嘅，都擔心將來購併後，重疊嘅舊人會被裁走，所以都秘密搵緊窿路，事關呢單購併會有保障條款，就係唔炒得間美資行嘅人，於是只好向中資行自己內部開刀，而炒嘅目標當然都係香港人。
其實近排中港兩地咁多金融方面嘅好消息，金占士一直聽到好幾間畀人游說緊，買家大部分係有財力嘅中資大行，但賣家亦都見形勢大好而叫天價，其中一間上咗市嘅中型行，其實過去十年來都有傳被人洽購，但佢老細賣嘢又要「搭豬頭骨」，近排就傳有間好有財力嘅內險背景證券行傾得好埋，即管再留意吓傾唔傾得成啦。
金占士