內地A股晨光生物尋日暴升10.03%，觸發漲停機制，有分析話，呢間公司有提煉一系列天然植物精華嘅技術，其中一種產品辣椒鹼可以用嚟生產催淚彈。
抗議多引需求遐想
點解半日已經升咁多，內地分析話早兩日，四川什邡市有市民喺市政府門口聚集，抗議當地興建鉬銅冶煉廠污染環境，最終公安出動催淚彈驅散群眾。終於明白，原來係炒催淚彈需求！
絲絲估計，可能內地投資者預期內地對催淚彈嘅需求只會有增無減啩。
不過據《華爾街日報》報道，辣椒鹼其實只係佔公司收入嘅一小部分，所以都唔清楚點解升咁多。究竟只係短期炒作，定抑或係另有利好嘅消息，真係不得而知。總之一句，就算真係有概念可炒，都咪炒咁耐。