越秀房託（00405）「蛇吞象」購買廣州國際金融中心（GZIFC）計劃，已經喺上星期五向小股東發出通函，解釋整個收購嘅詳情。不過原來中間都有一段小插曲，話說越房管理層希望呢本490頁嘅通函用全彩色印刷，但因為上個禮拜颱風襲港，打亂晒進度，最後只得最前10頁可以全彩，其餘都係黑白。
其實為咗出呢本通函，越房嘅工作人員可謂趕到甩轆，原定要喺六月十八日寄畀股東，但因為趕唔切而要向交易所申請延期至六月三十日。絲絲尋日同越房嘅管理層食飯，佢哋話通函最終喺上星期三定稿，印刷公司原本同佢哋講，話印全彩色需時55個鐘，後嚟擔心打風，被迫將印期壓縮，無奈地將後面480頁改為黑白印刷。
絲絲認為，通函屬於法律文件，九成以上都係文字，收到嘅股東未必會覺得彩色印刷會帶來驚喜，無乜必要去浪費金錢印彩色囉。
講番越房呢單「刁」，GZIFC寫字樓部分目前有20%樓面由越秀集團自用，通函入面就承諾至年底前寫字樓總出租率可以去到70%，依家仲爭10個百分點就達標。越秀企業資本經營部副總經理馮志東尋日就話，以目前廣州嘅市況，要達標應該冇問題，唔需要靠集團內其他公司租用，嚟製造高出租率嘅假象。