因為寫咗份沽空報告攻擊恒大（03333）而「聲名大噪」嘅香櫞研究（Citron），之前炮製咗唔少炸彈轟炸內地民企，但呢家美國機構都唔敢將沽空內地公司當係探囊取物。佢嘅創辦人萊福特（Andrew Left）最近同內地傳媒講，話唔敢沽空大陸國企同埋銀行，事關佢哋有政府喺背後撐腰！
佢仲話，寫咁多份報告踩大陸公司，唔係對大陸有偏見，只不過係大陸嘅流動性大過其他新興市場，咁巴西都係大市場喎，點解又唔搞巴西呢？佢話巴西呢類市場太多資源公司，對呢類股票冇咩興趣。咁佢對咩股票有興趣呢？萊福特好謙咁話，自己身在美國，好難吓吓親臨現場查大陸嘅房地產，但佢可以了解互聯網，所以對大陸互聯網公司都幾關注o架。咦！佢咁講，大陸嘅互聯網公司睇怕要(目及)實香櫞嘅動向喇！
為咩又對恒大產生「興趣」呢？佢就話，佢都係幾個月前碰巧發現恒大有問題要了解，仲請咗十幾個大陸人幫手翻譯恒大嘅中文文件，同埋做調查。不過依家佢對恒大好似轉咗口風，話恒大冇舞弊同欺騙，只係會計手法激進啲。吓！佢份報告之前唔係話，香櫞唔係唯一認為恒大有舞弊行為嘅分析機構咩！