Market Insight：兗煤有望見底回升

美國數據欠佳反而有得炒QE3，而美國企業業績期又至，上個禮拜連nike業績都令人失望，今期派成績表可能成地眼鏡碎。近期唯一搶鏡嘅係中國六月官方非製造業PMI升至56.7，其他內地經濟數據又就快公布，CPI話鐵定破三，人民銀行昨逆回購1,430億人仔，下一步到減存備率順理成章。

昨日升市成交仍然唔夠500億元，相反沽空金額54億元，連日維持超過一成。CY上任首個工作日，本地地產股竟然最醒神，國壽（02628）升上20蚊樓上蟹貨區仍能以全日最高位20.85元收市，反映短期氣氛相當不錯。防守股亦各自各精彩，領匯（00823）在內嘅4隻REITs股齊創52周新高。

放大圖片

放大圖片

汽車股高峰已過

至於下跌股都唔少，創52周新低股份達43隻，正一係貧者愈貧、富者愈富，跌得最慘係汽車股。廣州繼北京、上海同貴陽之後亦實施限購令，最驚係其他城市陸續有來。前排公布汽車舊換新政策以商用車為主已感大事不妙，炒國策原來係「表錯情」。雖然汽車業帶動其他行業有好大乘數效應，但話晒係奢侈品，用公帑去補貼似乎道德理據不足，況且會造成塞車同空氣污染問題。

中國汽車業發展相當畸形，早幾年車廠產能過剩要打減價戰，但不出幾年需求已追上供應，中國近年汽車銷量增長驚人，愈來愈多人買得起汽車代步或炫富，車廠於是唔理三七廿一又大幅擴產，搞到今年又出現減價戰，但車廠出於一個概念：需求好快又會追上來，不過限購令呢招相當毒辣，車股恐怕有排冇運行。

七月首先「翻身」嘅係煤炭股，水泥、鋼鐵同煤炭係上半年最慘澹嘅行業，由年頭跌到年中，尤其係今年夏天內地特別多雨水，搞到水泥價跌勢未止，上個禮拜再跌0.78%，加埋水泥股輪流發盈警，結果唔跟大市又唔跟內房股而獨自神傷。

煤炭股都唔好過，五月小陽春後又連跌8周，環渤海5500大卡動力煤已跌到每噸接近700蚊人仔，同中央封頂價已相差100蚊人仔。需求疲弱主要係內地電力增長放緩，另外多雨水亦有關係，令水力發電取代火電供應，而電煤庫存一直高企。

煤炭短線需求增

不過，昨日內地傳媒一段報道則令煤炭股「醜女大翻身」，報道話發改委在內幾個部委研究將合同煤同現貨煤價合併。講股佬講得多：兗州煤業（01171）以現貨煤為主，中國神華（01088）同中煤能源（01898）則賣合同煤為主，實際分別係通常現貨煤利潤較高，但合同煤就確保供需穩定。

阿爺出新招原因係近期內地煤價大幅下滑，現貨煤及合同煤價格愈走愈近，所以趁機會提出改革。但實際是否可行仍係值得懷疑，就如煤電聯動講咗幾年都未能成事，今次改革需要配合電價有更大彈性，同時會受既得利益者反對。

無論係點，煤炭股久沉咁耐，股價已反映咗不利因素，淨係博反彈已大條道理。而煤炭價格亦接近見底，畢竟夏季係用電高峰期，連日本都要重開核電站。博反彈首選仍係兗煤，因為現貨煤為主嘛。

次季內地房企加速減價推盤，致使樓市成交明顯增加，房企可以套現應付項目發展及到期債務，用家可以較相宜的價值買得心頭好，可謂雙贏局面。近日一大堆市場統計數據顯示，六月份內地主要城市房市出現價量齊升的現象，正好解釋為何六月以來內房股表現回勇。繼上月中國海外（00688）股價創52周高後，昨日輪到華潤置地（01109）、世房（00813）及融創中國（01918）股價同創52周高位。

二三線內房接力

之不過，樓市回暖，會否成對下半年貨幣政策鬆動帶來制肘？古勝相信，至少有一點可以肯定，乃中央不會放鬆對樓市嘅調控，但只要樓市改善並非去到投機分子死灰復燃嘅地步，則進一步收緊樓市調控嘅可能性不大。

是故，相對於上半年，下半年內房股的基本因素可望繼續獲得改善，而隨着一線內房股陸續升穿近年高位，二、三線內房股嘅資金回籠進度只要跟得上大隊，股價有望發力追落後。

古勝