Million大追尋：投資股惑 為你破解

分散投資實無死？

幻想一：買多幾隻股票等於分散投資，咁就可以分散風險。

王：「大家諗住將雞蛋放入不同嘅籃就等同分散風險，但當所有籃擺落同一架車咪又一樣死得！分散投資意思要考慮投資項目嘅地區、市場、行業、產品係咪集中埋一齊。就算你已經分開買幾隻股票，到頭來個幾隻股票基本上屬於同一個市場、同一類產品嘅時候，你根本就冇分散到風險。」

「如果一般投資者希望分散投資風險，可考慮購買基金，基金大多唔會偏重投資某幾隻股票，可以減低風險。」

買股長揸包唔輸？

幻想二：股票買咗返嚟就放埋一邊唔好理，即使跌價都繼續持有，反正不賣就不賠，長揸穩賺！

王：「長揸一隻股票同長線投資係兩回事！無錯，投資回報期可以長，但最緊要知道自己嘅長期目標係咩，唔好期望一間公司長此下去都會有偉大盈利。投資者要不斷檢視投資組合，當發覺計劃達唔到要求，就要諗吓到底係原先設定有問題，抑或有其他原因呢？」

「如果你唔敢或者唔願意面對投資錯失，繼續由得佢錯落去，你會錯過令自己輸少啲嘅機會。而且世界唔同咗，經濟變化、波動比以前更加頻密、波幅更加大，你打算長線投資嘅時候，更加要諗清楚你長遠睇好係咩市場、行業呢？佢哋係咪值得你長遠睇好呢？」

唔上唔落唔使理？

幻想三：我隻股票冇升冇跌， Keep耐啲應該冇問題，遲下先再算。

王：「投資者要考慮自己的機會成本，你唔投資呢樣，大可用筆錢做其他嘢。如果你真係咁冇所謂嘅話，倒不如借咗筆錢畀我先，我擔保5年後畀番舊錢你，你得唔得呀？」

「你唔係對隻股票冇期望，只不過你冇講出嚟，點都會想隻股票升，不過依家冇升冇跌，就安慰自己，但股票一路唔升唔跌，唔代表佢之後會變好。股票達唔到要求，咪考慮下其他投資項目或者方法囉。」

冧市撈底唔會衰？

幻想四：高沽低買實無錯，股市一大跌，我就入市撈底博反彈。

王：「高沽低買講就易，真係做你就會驚！當股市跌到全世界都話死梗咪係底囉，但冇人會敢去撈，到開始有人撈，你再去撈，到時撈頂就有！啲人成日諗等個市再跌啲就撈底，咁幾時先係跌到底，邊個又估得到呢？當股市去到高位時，又係咪真係可以繼續上呢？」

「人永遠都覺得可以低買高賣，但大部分時間都係掉番轉，通常都係高買低沽。如果自己冇呢份能耐，不如透過儲蓄、基金等慢慢累積財富。」

夠膽買大賠得大?

幻想五：我仲後生，想試吓高槓桿買賣，高風險先會有高回報嘛。

王：「當你想賺個double時，即係要由100元變到200元，你要掉番轉諗，當100元變到得番0元，你承唔承受得起？如果你只可接受到100元跌到90元、80元，覺得唔會影響你日常生活時，你只可以期望100元最多會升到120元。仲有一點，當100元跌到50元，跌一半，但由50元升返100元，就係升一個double。喺投資市場跌50%好易，但升100%可以好難。」

「投資者考慮回報嘅時候，除咗諗住要升幾多，亦要諗會跌幾多，知道自己跌到某個價位仲頂唔頂得順，有足夠心理準備隨時要付出代價。」

康宏王利民醒你：切記認輸唔認叻

王利民有句私人金句贈予各位投資者：「認輸唔認叻」。坦然面對投資決定失誤，不要自欺欺人，盡快調整自己的投資計劃。當投資回報符合預期時，要明白大部分時候都係市道好才令你獲利，所以千萬不要「認叻」。當你對自己的投資決定過分自信時，判斷能力就會出現偏差，容易忽略投資的不利因素，到頭來「聰明反被聰明誤」。