拍心口保證質量
好似最近就有朋友同絲絲講中國聯通（00762）最快會喺第三季，喺內地推出一款超級智能手機，處理器係用1GB芯片，螢幕有成4.4寸，就咁睇個規格都唔錯，而且只係賣五百蚊人民幣咋，咁先至吸引！
絲絲心諗，啲質量得唔得o架，朋友即時拍心口話，聯通質量就有保證啦，講真，其實聯通之會賣平價智能手機，無非想喺3G大戰中先拔頭籌，亦好為跟住嚟嘅4G大戰儲定客先。講真，家陣聯通、中電信（00728）同中移（00941）喺內地，為咗3G呢個市場都爭崩頭。聯通唔吓吓出新招快過人，點頂得住中移老總奚國華先前話，隨時攞幾百億落嚟就可搞掂聯通咁厲害！