絲絲講場：郭珮芳曬住宣傳國債
三十四度嘅悶熱天氣下，絲絲撞到建行亞洲行政總裁郭珮芳（Miranda）四圍宣傳國債，於是就同佢一齊搭叮叮遊車河，個個都熱辣辣，曬到紅卜卜。親力親為嘅Miranda仲笑言，希望財政部唔好一年嚟一次咁少，應該每一季都嚟香港發債咁話！
加時辦公便利打工仔
漫遊半條電車路，主要係宣傳國債喺香港發行，兩年期，年息2.38厘，Miranda仲話計埋人民幣有約2%嘅升值空間，回報都幾吸引。絲絲聽聞，該行有好多優惠迎接國債，全線分行仲會延長營業時間到七點，方便打工仔放工之後去認購國債添！
話說回頭，尋日打風前夕，熱到飛起，絲絲見到唔少記者都大汗疊細汗，有女記者連妝都甩咗一大半，不知幾狼狽。