自從做咗中國證監會主席之後，郭樹清嘅曝光率可以話冠絕內地所有監管機構嘅老總，啱啱郭總就出席上海市政府和一行三會（人行、證監會、銀監會和保監會）聯合主辦嘅二○一二年陸家嘴金融論壇擔任主講之一，而論壇嘅主題係「金融治理改革與實體經濟發展」，絲絲睇見就覺得好嚴肅喎，之不過，郭總嘅講詞就夠晒生動，起碼聽落唔會覺得悶先！
呢趟郭總嘅演說，就以喺上海「打的」嘅實況來比喻上海，佢話上海嘅的士司機很少會兜路，因為上海嘅的士行業經營係有規範嘅，做得非常之好，而這正正係上海能夠成為國際金融中心嘅重要條件。結果，即時引起場內哄堂大笑。但郭總即時叫大家唔好笑呀，因為呢點好關鍵，係上海嘅「軟實力」。
郭總形容，從「打的」就可以體會，上海金融生態很好，因為誠信水平比較高。而誠信水平高對一個國際金融中心好重要。至於點樣可以提升上海嘅「軟實力」，郭聰呢方面就不忙介紹一下中證監會點樣下工夫，例如積極引進機構投資者、發展現代財富管理行業、培養優秀的分析師隊伍、擁有長期投資價值理念嘅公司等等。