上市公司分紅，但遭到小股東建議，唔要現金要產品？搞邊科呀？原來單嘢係出自內地A股上市公司貴州茅台，近日茅台公布去年度利潤分配實施報告，向全體股東按照每10股派紅利39.97元（人民幣‧下同），連稅在內，呢個分紅水平據講喺A股之最，但卻偏偏有位小股東張先生寧願唔要現金，反而提出，每年分紅可否將分到的現金轉為茅台酒。
張先生在茅台酒網上交流會中，提出分紅轉為分酒，原來佢話咁樣可以增強茅台股東嘅自豪感，兼夾仲可以增強長期持股嘅信心。
據了解，張先生目前揸住600股貴州茅台，以茅台上海A股尋日收報239.15元計，股份價值14.35萬元左右。雖然目前持股數量並不多，但係張先生話佢係從○六年就開始買貴州茅台股票，在這近六年時間裏頭，已經賺咗超過80%。
「與其現金分紅，不如給投資者發茅台酒。」張先生理直氣壯咁話，貴州茅台公司可以根據每個股東獲得嘅分紅金額，以市價折算成一定數量嘅茅台酒分畀股東，股東也可以自己選擇是要現金還是要酒。
對於點解會諗出呢個「創意」，張先生坦承，自己之前都冇諗過，但係睇到茅台酒咁受歡迎，才突發奇想，諗出呢個建議。佢仲笑笑口話：「呢個分紅方式係一舉兩得，一方面可以提升公司嘅茅台酒銷量，另一方面又能鼓勵更多嘅人持有貴州茅台股票。」
不過，對於張先生嘅建議，貴州茅台董秘辦人士回應傳媒時就話，目前內地有關法規只規定了現金、送紅股、公積金轉贈股本三種分紅方式，實物分紅嘅方式不合規定，也沒有先例。絲絲心想也有道理，以實物嚟分紅，講就易但做就難，因為譬如上市公司做電視嘅，以實物嚟分紅，當你持有10萬股，我咪送10台等值電視給你，但如果上市公司係賣樓嘅，唔通我又送層樓畀你，咁樣，現實係無可能會出現啩！
余詩韻