尋日絲絲參加一個高峰會，會上咁啱見到滙豐亞太區業務策略及經濟顧問梁兆基（George），自然敍敍舊，寒暄一番。話題自不然係近排環球嘅焦點歐債危機，但George就話家陣歐洲嘅情況好似我哋香港嘅○二、○三年時，當年George原來都係同好多港人一樣，變成負資產一族！
講開當年嘅慘況，絲絲都歷歷在目，當其時香港樓價大跌逾六成，個個都變咗負資產，估唔到連George都唔例外，加入負資產行列！正所謂禍不單行，George仲話當年「工就做多一份，但人工就劈咗一半」，峰會在場嘅人個個都拍晒手掌，一定係感同身受啦！
但係諗真啲，George之前係總經濟師，依家就變咗亞太區業務策略及經濟顧問，計絲絲話，個職銜大咁多，有個「亞太區」印在名片上，都可算苦盡甘來，點計都有着數！
至於目前歐洲嘅狀況，George就覺得歐洲就無香港當年咁好彩，經濟復甦得咁快，仲話無番十年八載，歐洲都難以翻生，因為歐洲嘅生產力無我哋香港人咁犀利，香港人可以開OT，但係歐洲人五點幾就要放工返屋企休息喎！