相信大家仲記得中銀香港（02388）前「掌櫃」李永鴻（Raymond），自從佢○九年榮休後，就經常香港美國兩邊飛，絲絲都好少機會見到佢，但喺上個月佢就靜極思動，出任富邦香港嘅董事總經理兼行政總裁，究竟邊個咁有「牙力」請到Raymond出山呢？原來就係人稱「大董」、「二董」嘅富邦金控蔡明忠及蔡明興兄弟。
話說年初時Raymond因緣際會下同大董二董傾偈，發覺佢哋對發展中港台業務嘅願景好吸引，以富邦金控嘅規模亦應該有更大嘅發展空間，所以初初諗住做吓顧問角色，分享吓自己經驗。
點知愈深入咁傾落去，就發覺要實現願景，「兼職」形式嘅顧問根本唔足夠，要出任全職落手落腳咁去做先應付到龐大嘅工作量，掙扎咗好耐之後先決定重出江湖。
問到退休咗咁耐再重投工作會唔會唔慣，Raymond講笑話重拾番一種久違嘅感覺，就係逢星期四就好雀躍，因為就快到星期六可以放假；不過絲絲覺得Raymond滿腹鴻圖大計，應該日日都係星期一咁忙至真！