沉寂咗一排嘅內地啤酒股，近期傳出嘅新聞一浪接一浪。尋日停牌嘅青島啤酒（00168）又有新傳聞，內地媒體報道話當年有份參與百威英博入股嘅董事長金志國將會離職，絲絲打去公司諗住了解吓發生咩事，不過發言人未等絲絲問完就話因為聯交所嘅規定唔方便評論。
青啤前任總裁彭作義喺01年因為心臟病發去世，當時出任總裁助理嘅金志國以45歲之齡被委任接替職務，令市場為之意外。喺呢十一年期間金志國帶領青啤進行大規模嘅擴張同整合，最令外界津津樂道嘅係佢上任一年幾就將22.5%股份出售畀當時世界最大啤酒製造商百威英博。
不過，事有湊巧，喺上個星期二突然大手減持青啤套現嘅福建首富，兼自稱「中國巴菲特」嘅陳發樹，畀內地傳媒話原來曾經同金志國係同學關係喎！報道又話，金志國離職後會由依家出任總經理嘅孫明波接任。