證監會尋日發表最新年度年報，各名高層嘅年薪自然「大現形」。根據年報，行政總裁歐達禮2012年度人工總計係330萬元。但大家要知道，佢係舊年10月1號至正式返工，因此即係話，330萬只係佢半年人工啫！但呢個數仲未計可能有俗稱花紅嘅酌情薪酬！
雖然半年搵330萬，絕對係打工皇帝，但對比歐達禮以往喺律師樓做，可能只係「濕濕碎」，難怪之前有人估佢可能要減人工返證監會。再講，佢嘅「前任」韋奕禮，2011年度人工總計有成932萬元，歐達禮究竟全年人工幾多，大家要等明年年報至有分曉！
至於其他執行董事，全部都有人工加。張灼華2012年度薪酬共有683萬元，微升2%。人稱「打虎英雄」嘅施衛民，人工則有616萬元，上升5.6%，其中酌情薪酬為132萬元。施衛民近年屢破大案，立下大功，花紅增加，相信睇怕都冇人會有異議！
講開打工皇帝嘅薪酬，原來內地上市公司高管薪酬近年亦都嘭嘭聲咁升，根據《福布斯》啱啱公布嘅中國上市公司CEO薪酬榜，去年年薪過百萬嘅A股公司CEO多達294位，係歷來最多人上榜嘅一次。排喺首位嘅係內房股萬科嘅CEO郁亮，年薪連同花紅津貼，達1,300萬人民幣。
今次《福布斯》仲推出埋香港H股CEO薪酬榜，年薪總額更遠超A股CEO薪酬榜兩倍有多，排第一嘅係中國多金屬（02133）CEO朱曉林，年薪2億3千幾萬人民幣（99%嚟自認股證報酬），之不過，公司嘅業績就認真麻麻咋喎。
余詩韻