牛熊輪流炒：氣氛改善 留意恒牛63127
兩周前，中央官員突然向外放風話，領導人訪港時將送來禮物，舉動如此高調，市場有理無理先炒為上，炒得早當然有回調，好等「七一」臨近時再炒多轉。結果不出所料，昨日公布禮物又炒過，恒指收市升195點，收復萬九點關。
不過，缸邊友睇多過買，交投疏落，主板得嗰406億元，跟前日相差無幾。空軍就相對地勤力好多，昨日沽空額44.3億元，佔比近一成一。月初見底回升三個多星期的中移（00941）昨日突破，升至83.75元埋單，沽空一齊跟住上，昨錄得5億元沽空額，佔總沽空11.3%，佔股份成交37.3%。
下半年走勢難測
不少專家又拿水晶球，預測下半年走勢，似乎睇好的人唔多，無乜明顯方向的佔比都唔少。香港作為外向型經濟體，股市發展了咁多年，作為國際金融中心，有千幾隻股票在這平台交易，惟股市深度就一直為人詬病，成交多集中在幾十隻股票身上，低迷時發霉的三四線股多到螞蟻爬樹咁多，都咪話唔得人驚。
聽到有人話窩輪等衍生工具的發展，對香港市場帶來負面影響，筆者唔多同意此論調，產品相當中性，影響如何實際視乎槓桿多少，莊家角色、投資者認識及監管者責任，肯定的是輪場興起，部分細型莊家股無咁好炒。
恒指重上萬九關之上，市場氣氛轉好，月尾前做好的值博率似乎較高，不妨考慮小注恒指牛證。恒指法興牛（63127）今年十月三十日到期，收回點數18,500點，槓桿比率20倍，跟現水平距離約3.5%。
Handsome哥